Imirwano hagati y’Umutwe wa RSF n’Igisirikare cya Sudani yatangiye mu mpera z’icyumweru gishize ikomotse ku kutumvikana ku masezerano yagombaga gusinywa ku wa 1 Mata 2023 agamije kuvanga ingabo za Leta zihagarariwe na Gen Abdel Fattah al-Burhan usanzwe uyoboye Akanama ka Gisirikare gategeka igihugu na RSF iyobowe na Gen Mohamad Hamdan “Hemedti” Dagalo usanzwe unamwungirije, ibi byatumye ibihugu birimo Leta Zunze Ubumwe za Amerika, u Bwongereza n’u Bufaransa bitangira guhungisha abaturage babyo babaga muri Sudani.
Itangazo ryasohowe n’Igisirikare cya Sudani ryahamije ko Umugaba w’Ingabo zemewe za Leta, Gen Abdel Fattah al-Burhan, yemeye gufasha ibi bihugu gutwara abantu babyo mu masaha ari imbere. Rikomeza rivuga ko aba baturage baza gutwarwa n’indege z’Ingabo za Sudani, bose bagahagurukira mu murwa Mukuru wa Khartoum.
Mu gihe imirwano ikomeje gufata indi ntera hagati y’ingabo za Leta n’Umutwe wa Rapid Support Forces (RSF), mu itangazo Perezida Joe Biden yasohoye, yavuze ko abakozi ba ambasade n’imiryango yabo bahungishijwe n’Ingabo za Amerika, mu gihe imirwano yinjiye mu cyumweru cya kabiri.
Biden yakomeje ati “Ku mabwiriza natanze, Ingabo za Amerika zakoze ubutumwa bwo kuvana abakozi ba Guverinoma ya Amerika muri Khartoum.”
Minisitiri w’Intebe w’u Bwongereza, Rishi Sunak, na we yatangaje ko “Ingabo z’u Bwongereza zasoje ubutumwa bugoye kandi bwihuse bwo guhungisha abadipolomate b’u Bwongereza hamwe n’imiryango yabo muri Sudani, mu gihe ubugizi bwa nabi bukomeje gufata indi ntera n’inkeke ku bakozi ba ambasade.”
Yavuze ko bakomeje gukurikiranira hafi ibiri kuba muir Sudani, ari nako bacungira hafi umutekano w’Abongereza bakiri muri icyo gihugu.
Yakomeje ati “Ndasaba impande zombi gushyira intwaro hasi zigahagarika imirwano ku mpamvu z’ubutabazi, kugira ngo abasivili babashe kuva mu duce turimo kuberamo imirwano.”
Kuwa Gatandatu ni bwo byatangajwe ko Abadipolomate n’abaturage bagiye kuvanwa muri Sudani, ku ikubitiro ni abakomoka mu Bwongereza, Leta Zunze Ubumwe za Amerika, u Bufaransa n’u Bushinwa.
Perezida w’u Bufaransa, Emmanuel Macron, yaje guhishura ko abadipolomate bo mu bihugu by’i Burayi ndetse n’ahandi bahungishijwe muri Sudani, indege yabagejeje muri Djibouti.
Umutwe wa RSF ugizwe n’abahoze ari Aba-Janjaweed, washinzwe mu 2013 n’uwahoze ari Perezida wa Sudani, Omar Al Bashir, waje guhirikwa ku butegetsi mu 2019. Ni imirwano imaze kugwamo abaturage amagana, naho abagera mu bihumbi barakomeretse abandi bavanwa mu byabo.
INKURU YANDITSWE NA TUYISHIME Eric
