Abagore bakomejwe kwibasirwa n’abicwa n’inyeshyamba


Amakuru ava mu ntara ya Ituri ya DR Congo aremeza ko mu gitondo cyo ku cyumweru inyeshyamba za ADF zishe abasivile bagera kuri 14. Abishwe barimo abagore 10 nk’uko bivugwa na Radio Okapi iterwa inkunga na ONU, muri iki gitero cyabereye ahitwa Walese Vonkutu muri teritwari ya Irumu. 

Muri aba bishwe kandi harimo umwana w’imyaka ibiri. Mu gihe igisirikare cya Congo cyabashije gutabara nacyo kikica abarwanyi babiri ba ADF.

Izi nyeshyamba zashegeshe ako gace zakoze icyo gitero ahagana saa kumi z’igitondo ku cyumweru, nk’uko bivugwa n’abagize sosiyete sivile muri Ituri.

Mu bishwe n’izi nyeshyamba harimo kandi umusirikare umwe w’ingabo za leta.

Umutwe wa ADF uvuga ko ukorana n’uwa Islamic State, wakomeje kwiha inkumbi muri aka gace ka DR Congo, nubwo hashize imyaka hafi ibiri ingabo za leta ziri mu bikorwa zifatanya n’iza Uganda bigamije kurandura uwo mutwe.

Abagize sosiyete sivile muri Ituri bavuga ko igitero cyo ku cyumweru ku ngo zitandukanye z’abasivile cyatumye hari benshi bata izabo bagahunga.

Gusa bavuga ko ingabo za leta zatabaye “bikagabanya ibyago ko hicwa benshi”.

Intara za Kivu y’Epfo, Kivu ya ruguru, na Ituri zakomeje kuba isibaniro ry’ubwicanyi, ubusahuzi, gufata abagore ku ngufu, n’ubundi bugizi bwa nabi bikorwa n’imitwe yitwaje intwaro irenga 100 ihamaze imyaka irenga 20.

Leta ya DRC n’igisirikare binengwa kunanirwa kurwanya izi nyeshyamba, zirimo n’izikomoka mu bihugu bituranyi nka ADF (Uganda), FDLR (Rwanda) na RED-Tabara (Burundi).

Ingabo za ONU nazo zihamaze imyaka irenga 20 zinengwa kunanirwa inshingano yo kurinda abaturage no gufasha igisirikare kurandura iyi mitwe.

Aka gace ka DRC kari mu duce turangwamo umutekano mucye kurusha ahandi hose ku isi, nk’uko bivugwa na Global Peace Index ya 2022.

Source: Radio Okapi


IZINDI NKURU

Leave a Comment

This site uses Akismet to reduce spam. Learn how your comment data is processed.