Nyuma y’imvururu nyinshi ndetse n’amagambo y’urudashira yiganjemo ‘Twibwe amajwi’ ku ruhande rwa Trump, birangiye Joe Biden ukomoka mu ishyaka ry’Abademocrate yemejwe na Sena mu buryo budasubirwaho nka Perezida watowe wa Leta Zunze Ubumwe za Amerika.
Iyi ntsinzi ya Biden hiyongereyeho intsinzi y’abasenateri b’abademocrate babiri, ku matora yari ategerejwe muri Leta ya Georgia yagombaga kwemeza ubwiganze bw’ishyaka ry’abademocrate muri sena ari nayo ifata ibyemezo bya nyuma muri iki gihugu.
Izi ntsinzi zombi zitezweho kuzorohereza Perezida Biden gushyira mu bikorwa intego yihaye bimworoheye ubwo azaba yatangiye imirimo ku itariki 20 Mutarama 2021.
Joe Biden yatsinze ku majwi 306 y’inteko itora, akaba abaye Perezida wa 46 wa Leta Zunze Ubumwe za Amerika.
Donald Trump abaye Perezida wa mbere utegetse manda imwe gusa kuva mu mwaka wa 1992, ubwo byabaye ku Murepubulikani George H. W. Bush.
Twabibutsa ko Perezida Joe Biden, yabaye Visi Perezida ku butegetsi bwa Barack Hussein Obama, akaba yegukanye intsinzi nyuma yo gusaba abamushyigikiye gutuza.
Biden akaba yarahisemo Visi perezida w’umugore akaba ari umwiraburakazi Kamala Harris w’imyaka 56, akaba ari ibintu bibaye bwa mbere mu mateka ya Amerika.
NIKUZE NKUSI Diane
