Mu mpera z’iki cyumweru tariki 19 na 20 Ukuboza 2020 hari hateganyijwe shampiyona y’umukino wo gusiganwa ku magare “National Championships 2020” ariko kubera gahunda yo kubahiriza amabwiriza yo kwirinda COVID-19 iyi shampiyona nta bwo ikibaye.
Ibi byemejwe n’ishyirahamwe ry’umukino w’amagare mu Rwanda “FERWACY” aho babinyujije ku rubuga rwa “ Twitter” bagize bati “ Mu rwego rwo kubahiriza amabwiriza mashya yo kwirinda ikwirakwira rya COVID-19, shampiyona y’igihugu y’umukino w’amagare 2020 yari iteganyijwe ku wa Gatandatu tariki ya 19 Ukuboza 2020 no ku Cyumweru 20 Ukuboza 2020 ntikibaye.”
Iyi shampiyona y’igihugu yari igiye kuba mu rwego gufasha abakinnyi kwitegura Tour du Rwanda 2021 biteganyijwe ko izaba tariki 21 kugeza 28 Gashyantare 2021.
Shampiyona y’igihugu iheruka ya 2019 yegukanwe na Uwizeyimana Bonaventure mu kiciro cy’abakuru (Men Elite), Gahemba Bernabe mu ngimbi (Juniors), Ruberwa mu batarengeje imyaka 23 ndetse na Nzayisenga Valentine mu kiciro cy’abagore.
IHIRWE Chris
