Rwanda: Ubwandu bwa Coronavirus bukomeje kwiyongera

Minisiteri y’Ubuzima yatangaje ko kuri uyu wa Gatandatu tariki ya 20 Kamena 2020, habonetse abarwayi bashya 41  b’icyorezo cya Koronavirusi (COVID-19) mu bipimo 3,116 byafashwe mu masaha 24 ashize, hataha  abantu batandatu bakize neza.

Umubare w’abamaze gukira ugera kuri 357 muri 702 bamaze gutahurwaho icyo cyorezo mu Rwanda. Abarwayi babashya batahuwe biganjemo abo mu Karere ka Rusizi no ku Rusumo mu Karere ka Kirehe, bose bakaba bashyizwe mu kato detse n’abo bahuye bahita bakurikiranwa.

Kugeza ubu abakirimo kwitabwaho n’abaganga bageze ku 343 mu barwayi bamaze kuboneka  mu bipimo 104,889 byafashwe kuva umurwayi wa mbere yatahurwa muri Werurwe kugeza ubu.

Iki cyorezo kimaze gutwara ubuzima bw’abarwayi babiri mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi n’aka Rubavu twashyizwe mu kato mu gihe hagisuzumwa abantu ngo harebwe uko ubwandu buhagaze muri utwo duce.

Mu tundi turere, ingendo zihuza intara zitandukanye n’Umujyi wa Kigali zirakomeje. Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 287,385 barimo 132,959 bakize n’abandi 7,708 bahitanywe na cyo. Abamaze kwandura ku Isi bangana na 8,858,244 barimo abakize 44,717,323 n’abapfuye 464,763.

NIKUZE NKUSI Diane

Sangiza abandi iyi nkuru

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *