Guverinoma y’u Rwanda yatangaje bitunguranye ko ingendo zerekeza mu Ntara ndetse n’iz’abamotari, zari ziteganyijwe mu gitondo cyo kuri uyu wa Mbere tariki 1 Kamena 2020, zitakibaye kubera ingamba zo kwirinda ikwirakwizwa ry’icyorezo cya COVID-19.
Itangazo riturutse mu Biro bya Minisitiri w’Intebe riragira riti: “Nyuma y’isesengura, ingendo hagati y’intara zitandukanye, hagati y’intara n’Umujyi wa Kigali hamwe na moto zitwara abagenzi biracyabujijwe mu rwego rwo kurengera ubuzima bw’abaturage. Ingamba nshya zo kurwanya Covid-19 zizatangazwa n’Inama y’Abaminisitiri yo ku wa 2 Kamena 2020.”
Iki kemezo gifashwe nyuma y’aho imyiteguro ku bamotari ndetse n’ibigo bitwara abagenzi byari birimbanyije.
Nyuma y’Inama y’Abaminisitiri ni bwo hazatangazwa amabwiriza mashya ndetse n’ibindi bikorwa byemewe n’ibitemewe.
NIYONZIMA Theogene
